ОФИЦИЈАЛНА СЕЛЕКЦИЈА НА КРАТКОМЕТРАЖНИ ФИЛМОВИ 14. ФФФ

Ден 1 (123′)

[9.6 / 18:00] MONTANEA

[9.6 / 18:00] MONTANEA

[9.6 / 18:00] 15 МИНУТИ

[9.6 / 18:00] 15 МИНУТИ

[9.6 / 18:00] ПРОМЕНА

[9.6 / 18:00] ПРОМЕНА

[9.6 / 18:00] МОНИСТА

[9.6 / 18:00] МОНИСТА

[9.6 / 18:00] МАДЕН

[9.6 / 18:00] МАДЕН

[9.6 / 18:00] СИЛУЕТА

[9.6 / 18:00] СИЛУЕТА

[9.6 / 18:00] НА АВТОПАТОТ НА ЕДНО СКРШЕНО СРЦЕ

[9.6 / 18:00] НА АВТОПАТОТ НА ЕДНО СКРШЕНО СРЦЕ

[9.6 / 18:00] ГОЛЕМАТА ЕКСПЛОЗИЈА

[9.6 / 18:00] ГОЛЕМАТА ЕКСПЛОЗИЈА

<

>
[9.6 / 18:00] MONTANEA
9.6 (недела) 18.00 Кинотекa (бесплатна проекција)
MONTANEA [2023]
реж. Шарлот Луј / Charlotte Louis, FR, 15’

Дебитантскиот краткометражен филм „Montanea“ на младата француска режисерка Шарлот Луј е филмско-филозофски есеј кој ги допира есенцијалните филозофски теми: животот и смртта.

Импресивната актерска игра на Дени Лаван [Denis Lavant] и Феникс Бросар [Phénix Brossard], рафинираната визуелна поетика и сугестивната музичка илустрација на талентираниот Жан-Беноа Данкел [Jean-Benoît Dunckel] креираат длабоко метафоричен амбиент врз кој Луј умешно ги обликува сопствените егзистенцијални рефлексии за суштината на човековото времено постоење, за вечниот циклус на недофатливите промени и за застрашувачката извесност на смртта.
<

>
[9.6 / 18:00] 15 МИНУТИ
9.6 (недела) 18.00 Кинотекa (бесплатна проекција)
15 МИНУТИ [Cuarto de Hora / Quarter of an Hour, 2023]
реж. Себастијан Немо Арансибија / Sebastián Nemo Arancibia, CL / FR, 15’

Краткометражниот филм „15 минути“ ја раскажува приказната за Алекс, млад човек од Хаити кој живее во Чиле без документи и не зборува шпански. Една ноќ, додека разнесува весници со својот автомобил, доживува ужасна несреќа. Даниела, случаен минувач што говори француски, се согласува да им помогне на спасувачките екипи кои го транспортираат Алекс до најблиската клиника. Набрзо, во амбулантното возило, почнува да се расплетува потресна имигрантска приказна.

Филмот премиерно беше прикажан на филмскиот фестивал Трибека во 2023 година, како дел од Официјалната селекција на краткометражни филмови.
<

>
[9.6 / 18:00] ПРОМЕНА
9.6 (недела) 18.00 Кинотекa (бесплатна проекција)
ПРОМЕНА [Sværddrage / The Shift, 2022]
реж. Амали Марија Нилсен / Amalie Maria Nielsen, DK, 19’

Мило е сместена во дом за млади, гневни, неприлагодени девојки. Додека другите девојки се борат со сопственото проблематично однесување, таа води една многу поголема битка: со своето тело. Единствениот кој ја поддржува нејзината тивка полова транзиција е негувателот Ники, за кого таа е силно приврзана. Еден ден, откако Мило ќе наслушне дека тој си дал отказ, во нејзе еруптира гневот; и бидејќи прегратките сега се недоволни и бескорисни, таа го притиска копчето за аларм.

Приказната на Мило е приказна за растењето и ранливоста. За отсуството на поддршка во оние моменти кога перцепцијата за тоа што всушност сме, почнува да се менува. За соочувањето со системот кој често пати ги повторува и продлабочува токму оние проблеми што требало да ги реши.

Филмот премиерно беше прикажан на Берлинале во 2023 година.
<

>

[9.6 / 18:00] МОНИСТА

9.6 (недела) 18.00 Кинотекa (бесплатна проекција)
МОНИСТА [As Miçangas / The Beads, 2023]
реж. Рафаела Камело, Емануел Лавор / Rafaela Camelo, Emanuel Lavor, BR, 18’

Две сестри, Памела и Тисија, се повлекуваат во една осамена куќа потоната во амбиент на дива природа и тивко се подготвуваат за абортус. Додека Памела ги прима потребните лекови и лежи во скутот на својата сестра, Тисија ѝ ниже ѓердан од мониста. Околу нив, тивко и незабележано, по подот од куќата ползи џиновска змија.

Топла и моќна алегориска приказна, проткаена со длабока и амбивалентна симболика. Евокативно понирање во суштината на женственоста и вечните циклуси на животот, кое наведува и на нагласена рефлексија за репродуктивните права на жените во Бразил – а и во многу други делови од светот.

Својата светска премиера филмот ја имаше на Берлинале во 2023 година.
<

>
[9.6 / 18:00] МАДЕН
9.6 (недела) 18.00 Кинотекa (бесплатна проекција)
МАДЕН [Madden, 2023]
реж. Малин Ингрид Јохансон / Malin Ingrid Johansson, SW, 13’

Дебитантскиот краток филм на младата шведска режисерка Малин Ингрид Јохансон ја раскажува приказната за тинејџерката Маден која живее на фармата на своите родители во округот Вестгот, далеку од најблискиот град и вообичаените навики на своите врсници.

Кога не се грижи за животните и за својата помала сестра, зад шталата на нејзините родители, Маден вежба да оди на чевли со високи потпетици и копнее по нови искуства и хоризонти. Конечно, една тивка приквечерина, таа се качува на својот велосипед и јурнува по калливиот шумски пат кон градот и сѐ што тој ветува. Но во длабочините на шумата и ноќта, ваквиот индивидуалистички порив е неочекувано совладан од мистичната средба на Маден со кроткиот поглед на неколку крави побегнати од имотот на нејзините родители, од силината на одговорноста што одеднаш ја чувствува кон светот во кој живеела, од пејзажот на кој, се чини, потајно отсекогаш му припаѓала...

Филмот ја имаше својата меѓународна премиера на Берлинале 2023 година и беше награден за најдобар шведски краток филм на Меѓународниот филмски фестивал во Гетеборг.
<

>
[9.6 / 18:00] СИЛУЕТА
9.6 (недела) 18.00 Кинотекa (бесплатна проекција)
СИЛУЕТА [Silueta / Silhouette, 2023]
реж. Сава Доломанов / Savva Dolomanov, CZ, 18’

Една случајна средба во воз и неколку притаени погледи разменети со девојката која седи отспротива, ќе побудат, кај еден млад патник, миговна романтична фасцинација. Понесен од неа, набрзо посведочува немила сцена во која девојката е малтретирана од двајца туѓинци – но тој не е доволно храбар да ѝ помогне.

Веќе на следната станица, она што на прв поглед му изгледа како игра, како нестварно хипнотичко патување кон некаква недостижна но моќна љубовна поврзаност, ќе го одведе момчето во темниот и празен свет во кој живее девојката – и ќе го принуди да се соочи со некои од неговите најголеми и најскриени стравови.

Филмот беше селектиран во официјалната натпреварувачка програма на фестивалот Кустендорф во 2024 година.
<

>
[9.6 / 18:00] НА АВТОПАТОТ НА ЕДНО СКРШЕНО СРЦЕ
9.6 (недела) 18.00 Кинотекa (бесплатна проекција)
НА АВТОПАТОТ НА ЕДНО СКРШЕНО СРЦЕ
[Ethniki odos mias ragismenis kardias / Highway of a Broken Heart, 2023]
реж. Никос Кирицис / Nikos Kyritsis, GR, 11’

Среде една пустелија, на слабо осветлен дел од бескрајниот автопат, Марија налетува на празниот автомобил на човекот кој штотуку ѝ го има скршено срцето. Следуваат низа очајни обиди на Марија да го убеди нејзиниот доскорешен љубовник да ѝ се врати. Но едно мало изненадување драстично го менува текот на вечерта – а можеби и самиот живот.

Оваа трагикомична филмска етида на Никос Кирицис нуди живописен портрет на една средовечна, емотивно скршена жена – во извонредна изведба на Елена Топалиду [Elena Topalidou] – и на забавен и шокантен начин ги предизвикува стереотипните поимања за невината и наивна природа на љубовната романса, разоткривајќи ги нејзините скриени егоцентрични мотиви.

Својата светска премиера филмот ја имаше на Меѓународниот филмски фестивал во Тирана каде ја освои наградата за најдобар балкански краток филм за 2023 година.
<

>
[9.6 / 18:00] ГОЛЕМАТА ЕКСПЛОЗИЈА
9.6 (недела) 18.00 Кинотекa (бесплатна проекција)
ГОЛЕМАТА ЕКСПЛОЗИЈА [Big Bang, 2022]
реж. Карлос Сегундо / Carlos Segundo, BR/FR, 14’

Некаде во Уберландија во Бразил, Чико заработува за живот поправајќи печки, во чија внатрешност може лесно да се протне благодарение на својот низок раст. Не можејќи да го поднесе презирот на еден систем кој упорно го отфрла на маргините, тој постепено почнува да се спротивставува. И во еден момент, неговиот револт конечно експлодира – и се распрснува во слатка одмазда против елитите што го експлоатираат и угнетуваат.

Топла политичка сатира со јасна алегориска порака, натопена во многу разбирање за малиот човек и неговите борби да го преживее горчливото секојдневие на бразилското општество.

Филмот беше премиерно прикажан на 75. Меѓународен филмски фестивал во Локарно во 2022 година, каде што доби Златен леопард за најдобар авторски краток филм, по што следуваше негово претставување на бројни реномирани фестивали ширум светот.

Ден 2 (131′)

[10.6 / 18:00] ЧУЧУЕ / СИ БЕШЕ ЕДНАШ...

[10.6 / 18:00] ЧУЧУЕ / СИ БЕШЕ ЕДНАШ...

[10.6 / 18:00] ЛИМОНОВО ДРВО

[10.6 / 18:00] ЛИМОНОВО ДРВО

[10.6 / 18:00] НИШТО ОД СЕТО ТОА

[10.6 / 18:00] НИШТО ОД СЕТО ТОА

[10.6 / 18:00] НЕЕМИЦ / И ПОДОЛГО ОД ЗАСЕКОГАШ

[10.6 / 18:00] НЕЕМИЦ / И ПОДОЛГО ОД ЗАСЕКОГАШ

[10.6 / 18:00] ЖИМИ МАЈКА И ДА МИ УМРЕ НАЈМИЛОТО

[10.6 / 18:00] ЖИМИ МАЈКА И ДА МИ УМРЕ НАЈМИЛОТО

[10.6 / 18:00] ТЛО

[10.6 / 18:00] ТЛО

[10.6 / 18:00] СЕЌАВАЊА НА ЕДНА ПРАЗНА КУЌА

[10.6 / 18:00] СЕЌАВАЊА НА ЕДНА ПРАЗНА КУЌА

[10.6 / 18:00] МОЈАТА ДЕВОЈКА

[10.6 / 18:00] МОЈАТА ДЕВОЈКА

<

>
[10.6 / 18:00] ЧУЧУЕ / СИ БЕШЕ ЕДНАШ...
10.6 (понеделник) 18.00 Кинотекa (бесплатна проекција)
ЧУЧУЕ / СИ БЕШЕ ЕДНАШ... [Tsutsue / The Olden Days, 2022]
реж. Амартеи Армар / Amartei Armar, GH / FR, 15’

На периферијата на Теши, крајбрежно гратче во Гана – среде една непрегледно голема депонија што се излева во океанот – две момчиња, Соуа и Окаи, се обидуваат низ игра да се справат со загубата на нивниот најстар брат, удавен при една неодамнешна рибарска експедиција. Играта е прекината од застрашувачка глетка: труп на млад човек, исфрлен од немирните бранови на раздвижениот брег. Наспроти гласните противења на околината, Окаи, помалиот од браќата, е убеден дека телото припаѓа на неговиот брат – а и дека и неговиот дух мора да е сѐ уште некаде таму, макар и длабоко во океанот...

Превосходно трогателна приказна за љубовта, приврзаноста и тагата – вдахновена со мистична визуелна нарација – „Чучуе“ го отсликува и дехуманизираниот општествен контекст на современа Африка, како и непредвидените последици од многувековниот европски колонијализам.

Својата светска премиера филмот ја имаше на Канскиот филмски фестивал во 2022 година, како дел од Официјалната селекција на краткометражни филмови.
<

>
[10.6 / 18:00] ЛИМОНОВО ДРВО
10.6 (понеделник) 18.00 Кинотекa (бесплатна проекција)
ЛИМОНОВО ДРВО [Lemon Tree, 2022]
реж. Рејчел Волден / Rachel Walden, US, 17’

Ноќта на вештерките е голем празник за децата во Америка, па големи се и детските надежи во исчекување на последниот октомвриски ден. За време на празничната забава во едно северно предградие на Њујорк, во обид да го импресионира својот десетгодишен син, еден млад татко му го краде зајакот на панаѓурскиот магионичар. По возбудата од ситната кражба и пропратното бегство со автомобил, следува луда и хаотична авантура на патот кон дома.

Но, она што првично наликува на идилично патување, формативно на релација татко-син, почнува да се распаѓа при првите судири со суровата реалност. И како што таткото полека ја губи контролата врз себе и своите пориви, така и синот е принуден брзо и предвреме да созрева.

Филмот премиерно беше прикажан на Канскиот филмски фестивал во 2022 година.
<

>
[10.6 / 18:00] НИШТО ОД СЕТО ТОА
10.6 (понеделник) 18.00 Кинотекa (бесплатна проекција)
НИШТО ОД СЕТО ТОА [Nada de Todo Esto / None of Тhat, 2023]
реж. Патрисио Мартинез, Франциско Кантон / Patricio Martínez, Francisco Cantón, AR / ES / US, 17’

Неволно и со видлива помиреност, една млада девојка ја придружува својата мајка – на која „нешто не ѝ е добро“ – на необична авантура од нејасна природа, која на постарата жена се чини дека ѝ значи сѐ: разгледување на убавите куќи во богатите предградија на Буенос Аирес. Кога автомобилот ќе им се заглави во една раскошна цветна градина, мајката не може да ја скроти својата фасцинација од туѓиот дом. На чудење на домаќинката – а со видлива, висцерална опседнатост – таа влегува во куќата и предизвикува хаос од низок интензитет: разгледува, преуредува, а на крајот и краде.

Инспириран од истоимениот расказ од збирката „Седум празни куќи“ [7 Casas Vacías] на реномираната аргентинска писателка Саманта Швеблин [Samanta Schweblin], „Ништо од сето тоа“ нуди увид во една вознемирувачки надреална визија на современоста, пронижена од неизвесност, страв, психолошка нерамнотежа, тивка закана и неискажана огорченост.

Својата светска премиера филмот ја имаше на 76. Кански филмски фестивал во 2023 година, како дел од Официјалната селекција на краткометражни филмови.
<

>

[10.6 / 18:00] НЕЕМИЦ / И ПОДОЛГО ОД ЗАСЕКОГАШ

10.6 (понеделник) 18.00 Кинотекa (бесплатна проекција)
НЕЕМИЦ / И ПОДОЛГО ОД ЗАСЕКОГАШ [Nehemich / Forever, 2023]
реж. Јудаџит Басу / Yudhajit Basu, IN, 23’

Во руралната област Махараштра, Индија, неколку жени се принудени да го минуваат времето заедно, изолирани од заедницата во една скромна и трошна куќарка. Сместени се во неа поради тоа што се прогласени за отпаднички – или „допрени од врана“, како што се вели во нивниот локален идиом. Во реалноста, она низ што минуваат е сосема вообичаено во животот на секоја млада жена: циклус на менструација. Една од девојките – млада припадничка на локално номадско племе кое верува дека мртвите се враќаат во телата на најсаканите – се надева дека ќе побегне од ваквата реалност, некаде далеку, во прегратките на својот љубовник...

Длабок и поетичен, дипломскиот филм на Јудаџит Басу е опседнат од тегобна емоционална атмосфера, од тивко вознемирена интимност која лебди околу женските ликови притиснати од товарот на древните табуа, суеверија и сурови дискриминаторски практики.

Филмот премиерно беше прикажан на Канскиот филмски фестивал во 2023 година, како дел од Официјалната селекција на краткометражни филмови.
<

>
[10.6 / 18:00] ЖИМИ МАЈКА И ДА МИ УМРЕ НАЈМИЛОТО
10.6 (понеделник) 18.00 Кинотекa (бесплатна проекција)
ЖИМИ МАЈКА И ДА МИ УМРЕ НАЈМИЛОТО
Cross My Heart and Hope to Die, 2023]
реж. Сам Манакса / Sam Manacsa, PH, 18’

Мила е млада жена која работи на некаква логистичка позиција. Преоптоварена и недоволно платена, таа се гуши во тесната и неуредна канцеларија сместена во еден бучен и какофоничен кварт на Манила. Не можејќи повеќе да ја поднесе својата мачна реалност, очајнички трага по некаков излез. Еден ден, сосема неочекувано, серија на телефонски повици и еден мистериозен глас ќе ја поведат во романтичен ескапизам, навестувајќи ѝ можност конечно да оствари нешто длабоко и вредно.

Потресна приказна со неочекуван расплет, филмот на Манакса го отсликува колективното искуство на жените-работнички на Филипините, како и нивната сурова трудова експлоатација и цената што ја плаќаат со своето ментално здравје.

Својата светска премиера филмот ја имаше на Меѓународниот филмски фестивал во Венеција во 2023 година, како дел од Официјалната селекција на краткометражни филмови, по што следуваше богата фестивалска промоција ширум светот.
<

>
[10.6 / 18:00] ТЛО
10.6 (понеделник) 18.00 Кинотекa (бесплатна проекција)
ТЛО [Solos / Ground, 2023]
реж. Педро Варгас / Pedro Vargas, BR, 13’

Краткиот филм „Тло“ на младиот бразилски режисер и сценарист Педро Варгас ја раскажува приказната за Леонардо, млад работник на едно градилиште во Сао Паоло, кој еден ден почнува да слуша чуден звук што доаѓа од земјата под неговите нозе. Силно вознемирен од оваа мистериозна, хтонска порака – која како да му е упатена токму нему – Леонардо одлучува да преземе нешто.

„Тло“ се осврнува на влијанијата на систематското уништување на природата од човекот и неконтролираниот раст на пазарот на недвижности кој не само што ги руинира нашите пејзажи, туку се заканува да ги поткопа и нашите лични сеќавања, дури и оние кои резонираат во најдлабоките наслаги на земјата.

Својата светска премиера филмот ја имаше на Канскиот филмски фестивал во 2023 година, како дел од Официјалната селекција на краткометражни филмови.
<

>
[10.6 / 18:00] СЕЌАВАЊА НА ЕДНА ПРАЗНА КУЌА
10.6 (понеделник) 18.00 Кинотекa (бесплатна проекција)
СЕЌАВАЊА НА ЕДНА ПРАЗНА КУЌА
[Memórias de uma Casa Vazia / Memories of an Empty House, 2023]
реж. Бруно Карниде / Bruno Carnide, PT / ES, 11’

Експерименталниот филм „Сеќавања на една празна куќа“ на португалскиот аниматор и режисер Бруно Карниде е меланхолична симфонија на слики, гласови и звуци чија цел, токму како музичко дело, не е да прикажува, туку да евоцира.

Низ три последователни писма, ја следиме интимната исповед на една жена, а поетската нарација што надвиснува на фотографијата со секоја сцена понира сѐ подлабоко до најсуптилните и најтрогливи фрагменти од личната меморија.

Филмот ја имаше својата премиера на Меѓународниот фестивал во Тирана во 2023 година, и беше награден за најдобар португалски краток филм на Синеуфорија во 2024 година.
<

>
[10.6 / 18:00] МОЈАТА ДЕВОЈКА
10.6 (понеделник) 18.00 Кинотекa (бесплатна проекција)
МОЈАТА ДЕВОЈКА [Sahbety / My Girl Friend, 2022]
реж. Кавтар Јунис / Kawthar Younis, EG, 17'

Сара живее во традиционално семејство. Очаен за интимност, нејзиниот дечко Али прифаќа еден нејзин интересен предлог и тропнува на вратата од нејзиниот дом преоблечен како девојка. Измамата успева, па собата на Сара одеднаш се претвора во театар на чија сцена, отпрво незабележливо а потоа и неочекувано, улогите на Сара и Али почнуваат да се менуваат.

И она што почнува како невина игра, постепено, во текот на ноќта и следното утро, станува извор на тензија меѓу двајцата љубовници – но и на некои искуства и откритија кои единствено можат да се почувствуваат од другата страна, во туѓите алишта, под туѓата кожа, кармин и шминка...

Својата светска премиера филмот ја имаше на Меѓународниот филмски фестивал во Венеција во 2022 година, како дел од Официјалната селекција на краткометражни филмови.