Гости

Стефан Палитов е режисер, мултимедијален уметник и истражувач кој се фокусира на раскажување приказни, проширени реалности и уметност & технологија. Неговото академско образование вклучува додипломски студии по Филозофија на универзитетот Св. Кирил и Методиј - Скопје и студии по режија на ФАМУ во Прага, Чешка. Mагистерските студии ги завршува во рамките на Еразмус Мундус програмата Media Arts Cultures. Покрај создавањето играни и документарни филмови, Палитов има учествувано на изложби на ВР (виртуелна реалност) и мултимедијални уметнички дела. Дел од позначајните изложби се Ars Electronica и изложби во Копенхаген, Хонг Конг, Нанџинг, Чангша… Како дел од artist-in-residence престоите во Кина (поддржано од УНЕСКО) и во ZKM | Центар за уметности и мултимедија, Карлсруе (Германија), Палитов ја има истражувано историјата и дизајнот на 360-степени, ВР и интерактивните уметнички дела.

Владимир Љ. Ангелов по дипломирањето на ФДУ, кратко работи како продуцент во Вардар филм, а од 1995 г. работи во Кинотеката и во 2017 г. е назначен за директор. На почетокот на кариерата работи на рекогнисцирање и реставрација на македонскиот филмски фонд, a од 2006–2017 е одговорен за реализација на месечната филмска програма, реализирајќи и соработувајќи на голем број проекти како прикажување на филмски циклуси од разни национални кинематографии, ретроспективи на автори, како и презентација на програми посветени на филмската класика, но и на современата кинематографија. Од 1997 соработува со списанието КИНОПИС и објавува околу триесеттина текстови. Соработува со повеќе филмски фестивали, и бил член на жирија на Watch Out, Филозофски филмски фестивал, Синедејс.

Милан Ѓорѓевиќ (Скопје, 1981) е православен свештеник и вонреден професор на Православниот богословски факултет „Свети Климент Охридски“ во Скопје. По завршувањето на додипломските богословски студии во Скопје и магистерските студии по философија во Софија, во 2011 докторира средновековна философија на „Томас Институтот“ при Философскиот факултет на Универзитетот во Келн. Дисертацијата насловена како Nikolas Kabasilas – ein Weg tu einer Synthese der Traditionen е објавена под истиот наслов за издавачката куќа Peeters во 2015 година. Истата година излегува од печат и неговата прва книга на македонски јазик Византија во дијалог, а четири години подоцна и втората И на небо и на земја. Од 2019 год. е и преводот на монографијата Византиска философија на Георги Каприев. Организатор е на научни собири и дискусии од областа на теологијата и философијата.