Придружна програма 2019

 

10.05 (петок), 23:15
POST GLOBAL TRIO – ФИЛОЗОФСКИ МЕДИТАЦИИ
Аудиовизуелен перформанс на Тони Димитров, Димитар Додовски и Мартин Георгиевски
Кинотека

Post Global Trio е искуство. Искуство кое можете да го почуствувате на патот низ далечни предели. Внатре или надвор од себеси. Слика на јасни и суптилни звучни сцени и пејсажи. Влези во шумата. Остави го градот зад хоризонтот. Заборави на него… Сега навлези уште подлабоко. Во себеси. И пронајди се. Каков што беше пред да заборавиш. Проектот е создаден како континуитет на комуникација, соработка, потреба од развивање на одредена сцена. Звучна слика на долготрајни взаемни философски медитации. Post Global Trio е проект на Тони Димитров, Димитар Додовски и Мартин Георгиевски.

 

12.05 (недела), 16:00
БАДЈУ (Badiou, 2018)
– реж. Горав Калјан и Рохан Калјан / Gorav Kalyan & Rohan Kalyan [US], 83’
Излагање „Симптомот Бадју“

– д-р Марија Тодороска, независен филозофски истражувач
(Кинотека)
Фридрих Ниче има напишано дека секоја филозофија е секогаш биографија на мислителот. Животот на Ален Бадју (Alain Badiou) покажува дека и спротивното може да биде вистина. Од неговото раѓање во Мароко, преку настаните од мај 1968 г. во Париз, до неговите доцни години како ангажиран интелектуалец и филозоф, биографијата на Бадју можеби е неговото најкомплексно и најпредизвикувачко дело досега.Преку еден интимен и филозофски портрет, режисерите Горав и Рохан Калјан го создадоа првиот долгометражен документарен филм за еден од најпознатите современи филозофи денес, повикувајќи нè да мислиме со, а не само за Бадју. Адресирајќи ги контрадикциите во животот на Бадју преку филмот, режисерите се соочуваат со инхерентните контрадикторности на филмот како таков: мисла и акција, внатрешност и надворешност, присуство и отсуство. За да внесат нишка на емпатија, јасност и критика во нивната комплексна тема, тие мора да постават едно прашање, старо колку и самиот медиум: Може ли филмот да мисли?

Филмот беше дел од Официјалната селекција на Меѓународниот филмски фестивал Јихлава во Чешка (2018) и CPH:DOX во Данска (2019).

www.badioufilm.net

 

15.05 (среда), 11:00
Film-Philosophy after Jacques Derrida

д-р Дејвид Сорфа (Dr. David Sorfa)
Амфитеатар 4 на Филозофски факултет – Скопје

Делото и влијанието на Жак Дерида е малку истражувано во современата филмска теорија и филм-философија. Сорфа ќе покаже зошто Дерида е толку значаен за иднината на филмските студии.

The work and influence of Derrida has been rather overlooked in contemporary film theory and film-philosophy. Sorfa will present an argument for the importance of Derrida for the future of Film Studies.

*предавањето ќе се одвива на англиски јазик

Во соработка со Филозофскиот факултет при УКИМ

 

16.05 (сабота), 22:30
JAZZ ВЕЧЕР со SILENT SPRING QUARTET
Kафе бар Мартини во Лептокарија (зад Кинотеката на Македонија)

По вечерната доза уживање во филмската уметност, ве покануваме на неформална дружба во Мартини со страствена ритмичка експресија на SILENT SPRING QUАRTET и возбудливи и извонредно чувствителни соло варијации на: Дени Омерагиќ (контрабас), Нинослав Спировски (кларинет, тенор саксофон), Мартин Георгиевски (електроника, гитара), Владимир Мартиновски (тамбура, кавал, удиралки). 

Во текот на 2019 година Silent Spring Quartet планира да го релизира својот прв албум.